شعر: قاراداغ اؤلکه‌سینین گؤر نئجه دیوانه‌سی ام
قاراداغ اهلی بیلیر من نئجه دیوانه‌سی ام
بابکین داش قالاسی، هم نبی کاشانه‌سی ام
ایسته‌دیم بیر کره‌ده سئیره چئخام بو ماحالی
آیلارین هیجرانینا سون قویا بلکه ووصالی
کونلومو چَن بورویوب دوغما دیاردان آرالی
آخی من خان آرازین قان دولو پیمانه‌سی ام
قاراداغ اؤلکه‌سینین گؤر نئجه دیوانه‌سی ام
سئومیشم زیروه‌سی قار سهرامانی شاه داغئنین
باش بولاق اورتا قجللی قارالار یایلاغینی
مرد ایگیت میدانینی طُرفه گؤزل اویلاغینی
داغئنی اسلانینی سرت قایادان لانه‌سی ام
قاراداغ اؤلکه‌سینین گؤر نئجه دیوانه‌سی ام
منی مفتون ائله‌ین ورزقانین هئیواسی دیر
کیوانین آغ قیزیلی، مینجوانین بوغداسی دیر
بیر کلیبر زوغالی، بیرده اهر آلماسی دیر
اوشتبین آغ نارینین قیرمزی شاهدانه‌سی ام
قاراداغ اؤلکه‌سینین گؤر نئجه دیوانه‌سی ام
بسله‌نیب تای حجره هر قارا گؤز قیز گلینی
وئرمه‌ییب هر اؤتن اغیار الینه پاک الینی
وئرمه‌رم یوز لادانا آی بنیزین بیر تئلینی
گول خانیم نازلی صنم گول پری، گول دانه سی ام
قاراداغ اؤلکه‌سینین گؤر نئجه دیوانه‌سی ام
بو ائلین صنعتینه،حکمتینه باش اوجادیر
چون جوان عاشیق حسین تک اولو شاعیر یارادیب
افتخاریم او مرام عاشیقی صنعت‌کاری‌دیر
شاهدین داش اولان اوچ قارداشین افسانه سی ام
قاراداغ اؤلکه‌سینین گؤر نئجه دیوانه‌سی ام
سای حساب‌سیز بیلیرم کئچمیشینین قهرمانی
بیر مثل چون او وطن خادیمی ستارخانی
نبی تک چوخدو بئله خان بیه، قان اود دورانی
عاشیقی هر تکی‌ام قربانی هر دانه سی ام
قاراداغ اؤلکه‌سینین گؤر نئجه دیوانه‌سی ام
شعر گنجینه‌سی‌دی اوستاد عاشیق مسکنی دیر
خزرین حجمی قدر فولکلوریندان غنی دیر
شاعرین ایلهامی گؤم‌گؤی چمنی، گولشنی دیر
خان چوپان قوشماسی‌نین اینجه‌سی دردانه‌سی ام
قاراداغ اؤلکه‌سینین گؤر نئجه دیوانه‌سی ام
صحبت آچدیمسا دئیم تئللی سازین قدرتینی
مین کؤنول‌لر داشییر معنوی ائل ثروتینی
میللته دیل‌غمی آتدیقجا آنار قدرتینی
خان کرم مجلیس‌ینین غم ائوی غم خانه‌سی ام
قاراداغ اؤلکه‌سینین گؤر نئجه دیوانه‌سی ام
بیر زامان باسقی ائدیب شاهلیق ائد‌ن‌لر ائلیمه
خور باخیب‌دیر بایاتی قوشما گارایلی دیلیمه
او سبب‌دن چکیلیب غم سِگاهین زابلیمه
بیر شکسته قره‌باغ ماهنی‌سنین زیل سسی ام
قاراداغ اؤلکه‌سینین گؤر نئجه دیوانه‌سی ام
دئیرم بیرده گؤره‌یدیم او گؤزل چاغلارینی
تویلی بایراملی بوتون کندلی اولماغلارینی
بهمن افسون ائده‌ن نغمه‌لی یئغناغلارینی
مرادین چالدیغی اول تئللی سازین شانه‌سی ام
قاراداغ اؤلکه‌سینین گؤر نئجه دیوانه‌سی ام
خالقینا ائتسه ستم ظالیم آغیر گون گوزاران
عکس ائدر ماهنی‌سینا شعرینه نیفرت‌له اینان
ارتجاع ریشه‌سینه اودلو قلم ضربه ووران
ستارین سرمایه شعرینده‌کی تازیانه‌سی ام
قاراداغ اؤلکه‌سینین گؤر نئجه دیوانه‌سی ام
دینله اشعاریمی ای خالقلارا ظلمت توره‌دن
ایسته‌یب هر بیر عوام خلسه سایاق عقلی گؤده‌ن
بابکین اؤلکه سینه سورسه خلافت یئنی دن
شمشیره ال آپاران شاعیره مردانه‌سی ام
قاراداغ اؤلکه‌سینین گؤر نئجه دیوانه‌سی ام
محمد گل محمدی
