شوخانانین جغرافیایی دورومو
جغرافیایی دورومو
شوخانا کندی ایرانین آذربایجان بؤلگه‌سینین قاراداغ ماحالیندا (عرض جغرافیایی N"20'52˚ 38 و طول جغرافیایی E"18'45˚46) کلئیبر شهرینین یول اؤلچوسی ایله 47 کیلومئترلیغیندا یئرتوتوب.
بو کنده گئتمک اوچون ماشین یوللارین و جعرافیایی یئرین تانییاق :
نقشه‌ده گؤردویونوز کیمی شوخانا کندینه گئتمک اوچون ماشین یوللاری اوچ یئره بؤلونور:
کلیبر - شوخانا | پئیقان - شوخانا | عاشیقلی - شوخانا |
47 کیلومئتر | 54 کیلومئتر | 20 کیلومئتر |
کلیبر- شوخانا
کلئیبر >قله دره‌سی > شوجاباد > هیجران‌دوست > اغی > علی آباد > اوسکولو > کوله‌شلی > آغ‌داش > آینالییا گئدن یولدان 2 کیلومئتر کئچیب سول اله دؤنوروک > وایان > شوخانا
پئیقان – شوخانا
پئیقان > مرزولو > محمودآباد > ده‌ییر > آغ داش > آینالییا گئدن یولدان 2 کیلومئتر کئچیب سول اله دؤنوروک > وایان > شوخانا
عاشیقلی– شوخانا (آراز قیراغیندا)
عاشیقلی > کاللا کندینی تخمینن 3 کیلومئتر کئچیب ساغ اله دؤنوروک > وایان > شوخانا
چایلار
شوخانا چایی: شوخانا چایی، مزگر کندیندن آخیب شوخانادان کئچیب ائرقه‌نه چایینا و اودا آراز چایینا تؤکولور بو چایین ایچینده گؤرمه‌لی شیرنالار و داش قایالار وار کی بو وئرگی دوغالین گؤزه‌للیگینه داها آرتیریر .
وایان چایی:
بو چای وایان و شوخانا یولونون اورتاسیندان کئچیر و ائرقه‌نه چایینا و اودا آراز چایینا تؤکولور .
بولاغلار
برزآلتی باش بولاغی
دولئی باش بولاغی
دولئی سویونون گوزه‌لی güzəli
محرم بولاغی
یئل سویو : بو سو شوخانا و مزگر آراسیندا اولور
دئمه‌لیک کندین ایچریسینده بیر چشمه وار کی آیرانلی داغین اته‌ییندن یئرآلتی سولار بو چشمه‌نین قیراغیندان ائشیه تؤکولور.
بو سون ایللرده کندین ائولرینه لوله چکیلیب و سویو کندین گیریشینده کی چینار آغاجینین یانیندا تیکیلن اوستو اؤرتولو گؤلدن تأمین اولور .
داغلار
کئچل داغ :
بونا گؤره کئچل داغ آدلانیر‌کی کنده باخان اتک‌لرینده آزاراخ گؤی‌گؤیرتی وار اما اوبیری اَلی مئشه‌لیقدی، ائله‌کی مئشه‌نین ایچینه گیرمه‌یه اینسان وحشت ائدیر. ائله دوشونورسن کی هله بشرین آیاقی بو یئرلره یئتیشمه‌ییب. بیرآز ایرره‌لی گئدیرسن چوخ بؤیوک و یوکسک اوچروملار گؤرورسن. اینسانی حئیران ائدن آیاغینین آلتیندا مئشه‌لی داغلاری، درین دره‌لری و چایلاری‌‌دیر. اوتای آذربایجان و آراز چایینی اوردان سئیر اتمک اینسانی ماراقلاندیریر.
دمیرچی قلبیسی:
دمیرچی قلبیسی، شوخانا و دمیرچی کندینین آراسیندا یئرلشیب و اته‌یی شوخانا چایینا ائنیر. شوخانا – دمیرچی یولو بو داغین قارانلیق مئشه آدلانان مئشه‌لیکدن کئچیر.
میرزاغانلیق:
آغریب قلبیسی و آیرانی داغی بو کندین آیری – آیری قلبی‌لری و داغلاریندان ساییلیر.
مئیوه وئرن و دوغال آغاجلار ( اؤزلری بیتیب و بومی آغاجلاردان ساییلیرلار ):
گیرده‌کان، فیندیق ،زوغال ،یئمیشان ( آت گؤتو )، شیللان ( ایت بورنو )، آلچا ( چئشیدلی )، بؤروتگن ،هئندیل ، داغ‌داغان
گؤی‌گؤیرتی:
یارپیز، پولت، گزه‌نه، لنگری، جوجه گؤزو، جوری، بنووشه، خزال، پیاو، قویون قولاغی ( کندلی‌لر بونلارین چوخونو آش بیشیرمک‌ده و یارا و خسته‌لی‌یی ساغالماغا ایشلدیردیلر ).
شوخانادا تیکینتی:
بو کندین ائو تکینتی‌سینین فورمو قاراداغین آیری کندلرینه بنزر و ساده‌جه زیغدان، داشدان و آغاجدان تیکیلر .
کندین قدیم خان ائوی‌کی دامی و ایچه‌ری دیوارلاری تؤکولوب گؤزل معمارلیق سبکی ایله آدامین باخیشینی اؤزونه چکیر .
بو کند ده کئچن سون ایللرده مسجید دوزه‌لیب کی اؤز یئرینده کنده بیر گؤزللیک وئریب و کندین یاس تؤره‌تمه‌لری اوردا توتلور و محرم آیلاری کندده یاشایان‌لار، شهردن و آیری کندلردن اورایاا گلن‌لر اوردا عزادارلیق ائدیرلر.
تاسسوف‌له غلط سیاست‌لر باعیث اولدو کندلی‌لرین یوزده دوخسانی کنددن شهره ساری کؤچسون‌لر، و ایندی‌ایسه کندین چوخلو اسکی دام - داشلاری خارابا قالیب. آما بیر نئچه کندلی گؤزل و مودرن سبک‌ده ائولر تیکیب‌لر و کندین گؤرکمینده دییشیک‌لر و گؤزل‌لیک‌لر یارادیب‌لار. بو ائولرین بیرنئچه‌سی یایلیغ ائوی کیمی ( ویلایی ) ایستفاده اولونور.
